Mu gitondo cyo kuri uyu wa Kane nibwo ikipe ya Mukura VS yagarutse mu Rwanda yakirwa n’abafana bayo, nyuma yo gukora ibyo benshi batari biteze, ubwo yanganyaga na Free States Stars yo muri Afurika mu mukino ubanza w’irushanwa rya CAF Confederation Cup.
Umutoza wa Mukuru VS, Haringingo Francis Christian, yabwiye itangazamakuru ko mu minota 35 ya mbere ikipe ye yabonye amahirwe yo gutsinda ibitego ariko ntibyemere, mu gice cya kabiri ikipe yatangiye nabi ariko ibintu byaje gusubira ku murongo nyuma yo gukora impinduka. Ati “Tugeze hariya twashatse amakuru, batubwira ko ari ikipe ikomeye itsinda andi yose yaba Mamelodie Sundowns, Kaizer Chiefs. Twagerageje kubazibira, dutuma bakina imipira miremire, twari twabyiteguye, ba myugariro bacu ntibatumye hari amahirwe n’amwe y’igitego babona”.
Hussein Mugabo kapitene wa Mukura FC yatangaje ko mu mukino bakiniye muri Afurika y’Epfo, babonye amahirwe menshi y’igitego ariko ntibahirwa no kuyabyaza umusaruro, akaba yasabye abafana gukomeza kubaba inyuma. Ati “biduha akanyabugabo, nibakomeza gutya no ku itariki eshanu bazaze ari benshi dukomeza kubona intsinzi”.
IHIRWE Chriss
